Hræsnin, misskiptingin og óréttlætið ríður ekki við einteyming í þessu landi okkar

Enn og aftur er dregið í lottói hjá elítunni en núna voru fjórir stjórnendur LBI með allar lottótölurnar réttar og fá hver í sinn hlut um 90 milljónir! Rétt er að geta þess að þeir sáu sjálfir um að draga lottótölurnar.Um daginn var dregið í lottói hjá Framtakssjóði Íslands sem lífeyrissjóðirnir eiga og þar hlaut framkvæmdastjórinn 20 milljóna vinning fyrir það eitt að hafa náð að starfa í þrjú ár fyrir sjóðinn.

Ég skoðaði laun hjá nokkrum sem eru í stjórn Samtaka atvinnulífsins en hlutverk sjórnar SA er m.a. að móta launastefnu fyrir samtökin en eins og allir vita vilja Samtök atvinnulífsins koma á nýju vinnumarkaðsmódeli í anda Salek samkomulagsins.

Launin hjá þeim sem ég skoðaði voru frá tæpum 2 milljónum upp í tæpar 12 milljónir á mánuði en það var forstjóri Bláa lónsins sem var með um 12 milljónir. Að hugsa sér að þetta sé síðan sama fólkið og talar um mikilvægi þess að stöðva höfrungahlaupið, koma á stöðugleika og beisla launahækkanir er svo mikið viðbjóðsleg hræsni og siðblinda að það nær ekki nokkurri átt.

Já hræsnin, misskiptingin og óréttlætið ríður ekki við einteyming í þessu landi okkar en eins og ég sagði frá í gær þá hefur tekið 21 ár að hækka lægsta taxta verkafólks um 197 þúsund á mánuði en 200 launahæstu forstjórarnir fengu 200 þúsund króna hækkun á sínum mánaðarlaunum á einu ári í fyrra.

Í dag er lægsti taxti verkafólks 257 þúsund á mánuði en meðallaun 200 launahæstu forstjóranna eru rétt tæpar 3 milljónir á mánuði. Svo vilja þessir snillingar nýtt vinnumarkaðsmódel þar sem væru tæki og tól til að beisla möguleika verkafólks til að rétta hlut sinn!

Hugsið ykkur svo líka að svo tala fulltrúar Samtaka atvinnulífsins um að búið sé að hækka lægstu launin sérstaklega á liðnum árum og áratugum! Hvernig má það vera í ljósi þess að forstjórar fá sömu krónutöluhækkun á einu ári og verkafólk hefur þurft að brejast fyrir í 21 ár!

Það er morgunljóst að almenningur er búinn að fá upp í kok af þessari græðgisvæðingu hjá snobbelítunni sem telur sig hafið yfir annað launafólk í þessu landi.

Comments

comments