„Það er ljóst að Landsvirkjun er að fara fram á umtalsverða hækkun á raforkuverði sem getur hæglega ógnað samkeppnis- og rekstrargrundvelli stóriðjufyrirtækjanna á Grundartanga. Ef það gerist þá getum við Akurnesingar slökkt ljósin því þá er ekkert eftir hvað atvinnu varðar.“

Þetta eru orð Vilhjálms Birgissonar, verkalýðsforingja á Akranesi, sem skrifaði þetta í pistli á Pressan/Eyjan. 

 

Vilhjálmur rifjar upp ýmis áföll í atvinnusögu Akraness.

„Það er morgunljóst að margir munu missa lífsviðurværi sitt við þessa ákvörðun HB Granda að hætta landvinnslu fyrirtækisins á Akranesi. Rétt er að rifja upp líka að það er ekki bara að HB Grandi ætli að hætta allri landvinnslu á bolfiski á Akranesi heldur hætti HB Grandi líka starfsemi hausaþurrkunar en þar voru ein 28 störf undir.“

Áfram heldur hann og skrifar:

„Það hefur svo sannarlega orðið mikil blóðtaka í atvinnulífi okkar Akurnesinga á liðnum misserum og árum. Það er ekki bara að við séum búin að missa uppundir 350 störf sem útgerðafyrirtækið Haraldur Böðvarsson var með hér á Akranesi fyrir sameiningu við Granda, því rétt er að rifja upp að Sementsverksmiðjan hætti starfsemi hér á Akranesi árið 2011, eftir að hafa starfað hér frá árinu 1958 og lengi vel voru uppundir 180 manns sem störfuðu þar.“

Vilhjálmur líkir stöðunni við hamfarir:

„Á þessu sést hversu miklar hamfarir hafa gengið yfir atvinnulíf okkar Skagamanna og nú er svo komið að ekki verður lengur unað við þessa þróun. Enda hefur þessi skerðing á atvinnumöguleikum okkar Skagamanna margvísleg áhrif eins og t.d. á tekjur sveitarfélagsins og alla verslun og þjónustu í bænum.

Ofan á þetta allt bætist síðan við ógn við atvinnuöryggi þeirra sem starfa á Grundartanga, en það getur klárlega verið í uppnámi vegna þess að erfiðlega virðist ganga hjá stóriðjufyrirtækjunum að ná raforkusamningum við Landsvirkjun. Nægir í því samhengi að nefna að Elkem Ísland hefur ekki enn gengið frá raforkusamningi viðLandsvirkjun, en samningurinn rennur út í mars 2019.“

Comments

comments