Hér eru myndir af nýjum spítala sem verið er að byggja fyrir 300.000 manns við Herning á Vestur Jótlandi. Allt er þetta glæsilegt þótt það sé ekki alveg jafn-flott og tillagan frá Norður Sjálandi, sú sem við ætluðum að nota við Vífilsstaði.

Rétt eins og á Norður Sjálandi og annars staðar er ekki verið að reyna að troða nýbyggingunum upp að gömlum spítala í miðju bæjarins. Þess í stað er byggt upp á jaðri byggðarinnar þar sem andrými er nægt, framkvæmdir trufla engan og geta gengið hratt fyrir sig á hagkvæman hátt. Sjúklingar, starfsfólk og gestir geta svo notið þess að vera í opnu, grænu og fallegu umhverfi. Byggingarnar allar nýjar og allt eins og best verður á kosið. Engin mygla.

Sjúkrahúsið er byggt á túni við Vífilsstaðavatn þeirra Vestur Jóta sem þeir kalla Gødstrup Sø og liggur vel við samgönguæðum. Það er hægt að hjóla þangað en það er ekki skylda. Þeir sem það vilja komast greiðlega á staðinn með bíl eða lest.

Kostnaður er áætlaður um 50 milljarðar íslenskra króna (m.v. áætlun 2009 og gengi 2017). Sjálfsagt verður þetta eitthvað dýrara en hvað sem því líður verður það aldrei nema brot af því sem kröfuhafar afhentu íslenska ríkinu á síðasta ári, eða þá af því sem við spöruðum á að láta ekki undan fjárkúgunum á þar-síðasta kjörtímabili. Með öðrum orðum: Við höfum efni á að gera þetta á Íslandi. En höfum við efni á að gera það ekki?

Myndir:  aart architects, Herning Kommune, Vejdirektoratet, DNV og Hospitalsenheden Vest

Comments

comments