Egill Helgason

Egill Helgason

Egill Helgason pistlahöfundur skrifar í Silfri Egils um ógöngur borgarstjórnarmeirihlutans. En mislagðar hendur þeirra sem stýra borginni þessa dagana hafa ekki farið framhjá borgarbúum sem margir hverjir hafa stigið fram til að mótmæla valdhroka meirihlutans. Egill segir:

„Borgarstjórninni í Reykjavík eru vægast sagt mislagðar hendur þessa dagana. Hún þarf að glíma við hvert vandræðamálið á fætur öðru.

Borgarbúar pósta myndum af yfirfullum ruslageymslum, í fjölbýlishúsum eru íbúar hvekktir vegna nýrra reglna um sorphirðu. Almennt má segja að sú þjónusta sé orðin bæði verri og dýrari – en viðkvæðið er svosem alltaf að þetta sé gert í nafni umhverfisins. Nýju reglurnar tóku gildi um áramót, einmitt þegar mest er af rusli á heimilum. Það er enn eitt dæmið um klaufaganginn.“

En sorpmálin er ekki það eina sem Egill rekur:

„Borgin virðist vera að tapa slagnum um svokallaða „neyðarbraut“ á Reykjavíkurflugvelli. Það hefur reyndar aldei verið til neitt sem heitir „neyðarbraut“, þetta orð varð bara til í áróðursskyni. En borgarstjórnin hefur beðið lægri hlut í áróðursstríðinu og getur lítið gert við því.

Það birtast fréttir af gömlu fólki sem fær ekki að borða á dvalarheimilum – það er sérlega pínlegt að fylgjast með því.

Skólastjórnendur lýsa yfir áhyggjum vegna lélegrar fjárhagsstöðu grunnskólanna. Þar er stöðugur niðurskurður.

Fjárhagsáætlun borgarinnar var heldur ekki beysin og skuldastaðan hefur versnað. Það sem gæti helst verið borginni til afbötunar er að hugsanlega sé vitlaust gefið – að sveitarfélögum séu einfaldlega ætlaðar of litlar tekjur til að sinna þeim verkefnum sem til er ætlast. Hættan er að ekkert breytist í þeim efnum á tíma þegar ríkir lítil vinsemd milli borgarstjórnarinnar í Reykjavík og ríkisstjórnarinnar.“

Egill dregur síðan saman í niðurstöðu og skrifar:

„En svo má líka spyrja hvort borgin sé máski búin að byggja upp alltof stórt skrifræðisbákn? Að yfirbyggingin sé að bera undirstöðurnar ofurliði.“

Veggurinn tekur undir þessa skoðun Egils, vissulega búa sveitarfélög landsins við nokkuð þröngan kost og ljóst er að endurskoða þarf tekjuskiptingu ríkis og sveitarfélaga. Hitt er einnig ljóst að borginni hefur verið illa stjórnað í nokkuð langan tíma og báknið í borginni er orðið of stórt.  Yfirbyggingin er sannarlega farin að bera undirstöðurnar ofurliði. Það sýnir viðvarandi hallarekstur A-hluta borgarsjóðs vel.

Comments

comments